Дона батьö! Гижö тэныд медся ыджыд мужичöй миян котырын, тэнад пи Василей. Ёна нин дыр тэ миянлы эн гиж. Тэ эн тöждысь миян вöсна, миян ставыс бур! Мамö мунiс Асаньла, лысьтысьны мöдас. Нюрка да Агафья бара тышкасьны мöдасны, кодлы медводджыка еджыд быгсö юны. Сэсся мамö пыр горзö: «Васьö! Чойяссö босьт да мойдсö налы лыддьы, узьны воттöд!». А менам вед уна удж, батьö! Вот öнi пес тöв кежлö запта, мамлы отсала кöзяйствоын. Ветла чери кыйны, ёртъяскöд пышъялам вöрö; вотам вотöс да тшак, тöвйыс кузь! Дядьö Педыр вайис миянлы пызь мешöк, пуктi амбарö, аски ставсö сэнi чышка да шыръяссö вöтла!

- Ук, найö кутшöмöсь! Сöмын и кöсйöны сёйны миянлысь нянь!

Но ме вед котырын медся ыджыд мужичöй, ме ставсö верма! Ёна нин тэнö виччыся, медым ним лун дырйи, кор меным арын лоас дас во, пызан сайын и тэ пукалiн! Медым бара миян гортын вöлi медся ён да ыджыд мужичöй! А ме кöсйа лоны тэныд ичöт пиöн. Но регыд ставыс помасьяс! Вöрöгсö вöтлы, да лок гортö!

(Голос мамы:)

– Васька! Нюркасö да Агафьясö босьт! Бара став йöвсö кисьтiсны! Мойдсö лыддьы налы да узьны воттöд!

Алддзысьлытöдз батьö, муна отсавны мамлы!

Тэнад пи Василей.